介紹香港芳療 "真實" 情況

芳友Kaman Cheung 在荷蘭介紹香港芳療 "真實" 情況。


好贊同她說 "只係覺得present只講bright side，講到自己做得好成功，其實都係廢話。"


*******

【橫掂都係系列1之3 -- 唱衰香港人人有責crossover銅鑼灣書店】既然嚟開歐洲，老師話不如嚟埋學校嘅年度symposium，我即時反應係，「嘩大佬，全場講荷蘭文我真係聽唔明㗎喎。」然後老師都未等我講，就話橫掂都係，到時你嚟就順便講吓香港嘅情況係點啦，25分鐘啫。


原本諗住發吓呆做吓啦啦隊攝影斟茶遞水諸如此類，事情發展到咁，我又在唔知點推佢嘅情況下硬著頭皮，濫竽充數準備咗個presentation，講真醫護嘅嘢我識條鐵咩，唔係專長嘅嘢費事亂噏。諗咗幾個月，頭都爆埋都諗唔到講乜，到上個月Michael Wolf過身，啲人再share佢啲相，先醒起可以講吓香港住屋問題，同埋therapist在狹窄的地方做home care嘅難處（試過喺下格床幫個80歲插咗鼻餵喉中風腎衰竭嘅婆婆按摩，按完全身痛咗幾日；又試過要同社工合力將病人張床褥成張搬出廳）。


Present嗰陣，show埋Benny Lam輯籠屋相，講有20萬人住喺劏房，之後又畀佢哋睇吓流感高峰期醫院有幾咁迫爆（我試過唔止一次想攝埋去個病人度攝唔到，只能按吓腳）。然後又加埋少少香港私營老人院嘅慘況（我已經無講排隊排到死嘅情況），包括劍橋剝光豬沖涼嘅黐線故事。


因為咁多年嚟堆填區嘅訓練，我學識咗喺好悲傷嘅事裡面搵嘢嚟自嘲，所以一路講，一路喺度笑，突然間見到前排有個護士抹眼淚，然後睇清楚啲原來好多人眼濕濕，香港繁華背後係咁咁樣的（之前老師嚟香港，佢哋睇咗私家醫院、超高級院舍嘅情況，所以連老師都嚇咗一跳）。


嗰刻如果我突然發癲為香港人籌款，應該會有人肯捐，佢哋嗰刻嘅心情大概同我哋睇救助兒童會嘅阿米拉差唔多。喺基本住屋同醫療資源咁緊絀，護士做到就嚟吊頸嘅情況之下，乜嘢輔助護理係天方夜談。


唔係想唱衰香港，只係覺得present只講bright side，講到自己做得好成功，其實都係廢話。有人舉手問，點解政府唔增加資源喺房屋同醫療嗰度，真係擊中我要害，唔知點答（唔通要由肥上瘦下講起？），只係快快口講，政府應該關心起港珠澳大橋，多過香港人嘅福祉。


學芳療嘅人成日講用多啲monoterpene rich去增加空間感，用ester rich精油去放鬆，幻想處身喺森林或者薰衣草田，但對唔住，好多香港人一生都未去過森林同薰衣草田，你畀名貴嘅法國橙花、科西嘉島永久花佢，佢都會鍾意，但係咪relevant呢？間屋太陽根本都照唔到入嚟，想種棵薄荷都唔得，仲講乜嘢透過香氣帶佢哋返屋企呢？


最後為咗唔好太離題，我介紹咗幾種東方精油：白蘭花、當歸CO2、廣藿香同沉香（！！！！！！），除咗廣藿香之外，另外3種算比較少人用，但絕大部分嘅病人都可以一秒認出白蘭花，呢種由細到大喺街邊街巿聞得到，媽媽會買回家擺放，的士司機會放在車頭嘅香氣，對病人嘅幫助應該更大。


Present完後好多人同我講好震驚、好難過，覺得自己好幸運，唔應該投訴咁多（雖然呢個唔係我原意，不過是但啦）。然後有個比利時護士埋嚟問我，我咁樣講香港嘅問題怕唔怕被秋後算帳？我聽到好驚訝，然後佢話之前銅鑼灣書店事件令佢好震驚（而當時我係未講自己本業做乜），之後陸陸續續有人問我香港仲有無言論自由（我真係未講我本業做乜），問我林榮基宜家點（！），同埋我會唔會移民，而呢啲護士當中，有啲並唔係住係咩大城巿，令我都嚇咗一跳。