濕疹皮膚不要用精油

記住:


濕疹皮膚不要用精油，只用花水及植物油，新植物油及荷荷巴油+沙棘果油都有效


用麥皮水沖涼，佢發明用油開麥皮敷

芳友Kaman Cheung 分享她對濕疹的處理方法


【又到咗濕疹嘅時間喇】要辨別一個人有無曾經患過濕疹，係咪濕疹作戰兵團嘅成員，方式好簡單，只要你講一句，「近排啲濕疹又嚟喇」，而佢問你「點解你唔去睇醫生呀？」，你就知道，對方係從未出過濕疹嘅幸運兒。濕疹係現代人嘅長期抗爭，完全康復嘅希望隨時低過爭取到真普選，要求一個人、甚至乎一個家庭嘅生活模式同心態轉變，唔係話睇個醫生就解決到，好多長期濕疹患者，其實都經歷過無數次睇醫生又翻發，你問佢做乜唔睇醫生，真係難聽過粗口。


講到呢度，因為早一個月開始又爆濕疹，眼皮同頸都有，一直用油，到前日見好返，油又用完就停左，點知噚日起身即大爆發，眼腫、頸已損晒 好似戴咗紅色頸箍咁，頭皮耳仔似火燒，而我又趕住出門就無理，中間辛苦到完全集中唔到精神，淨係好想盡快返屋企。返到去即開火煮麥皮敷，再調油，夜晚痕到醒，就即刻補油，宜家仲未好。


麥皮水敷患處之前講過，係十幾年前做濕疹專題時藥劑師教，方法不贅。但煮麥皮始終多工序，所以我上個月都懶，就咁搽油算，但其實有個易用推介，是之前喺美國藥房買的，可以同大家分享，包裝寫住用嚟浸浴，但我就用嚟取代麥皮敷，用植物油來開，然後撻落患處，味道似麥精，無用水開咁易乾，一樣止痕。敷完沖水，如果用緊類固醇藥膏就照用，中間一乾就搽植物油，可放定喺床頭，就係咁。


成個程序係咁：
1.麥皮水/麥皮粉敷
2.如有醫生藥膏可喺度加，之後一乾就搽植物油
3.如唔用醫生藥膏就直接搽植物油（月見草Evening Primrose、琉璃苣Borage、沙棘果
Seabuckthorn、玫瑰果Rosehip、荷荷巴Jojoba、金盞花Calendula），有乜用乜，重點係唔好加
任何精油！唔好加任何精油！唔好加任何精油！


其他戒口戒冷氣暖氣棉質衫嗰啲，大家心照唔再講了。