玫瑰痤瘡病友分享

這個分享是Florihana 代理EROS Hong Kong 發出的的，我覺得內容幾好，有玫瑰痤瘡問題朋友可以看看，基本上最天然的護膚品就係花水同植物油。皮膚常出現敏感, 不穩定狀態, 太乾, 太油可考慮只用花水同植物油護膚, 最好連diy產品也不要用。

玫瑰痤瘡病友分享會❤️

(以下為超長文，有興趣可以花時間睇，多謝捧場！)

最近熱到登陸太陽咁滯，你有freestyle嗎？我冇，玫瑰痤瘡發作就有。咩係 Rosacea「玫瑰痤瘡」？面部長期發熱紅卜卜，唔好以為粉紅粉紅趣緻的臉，可能係玫瑰痤瘡其中一種徵狀。 呢個病成日被誤以為暗瘡或濕疹，不過只有玫瑰痤瘡先會面部滾燙。現今醫學暫時未確認成因，患者面部微絲血管擴張但唔識降溫收縮，於是面部經常又紅又熱。玫瑰痤瘡分泛紅血管型及丘疹膿皰型，前者會有血管擴張面紅問題，後者會長出一粒粒有膿頭嘅瘡。😞

玫瑰痤瘡有咩常見症狀？ Yo! Check it out! :
- 容易面紅及感到面部發熱🔥
- 長出類似暗瘡的粒粒
- 鼻的皮膚出現增生，形成痘皮般凹凸不平的印痕，甚至惡化至「酒渣鼻」
- 面部微絲血管浮現
- 皮膚異常敏感，喝酒後面部感到似被火灼
- 面部油脂分泌增加，毛孔粗大🌕
如你不幸地有疑似徵狀請盡快求醫，以免好似我咁拖延病情，延誤治療嚴重可致鼻變形，甚至影響眼睛結膜。

以下為本人真實病發經過😷：
2015年4月中去完台南曝曬六日後🌞，塊面生咗堆疑似粉刺物體，又痕又熱又紅。起初以為係敏感，兩星期後開始發炎於是去睇皮膚專科。醫生話係濕疹開咗類固醇藥膏，但由於太樣衰即使我好抗拒類固醇都搽少少。點知搽完類固醇藥膏全面太爆發，變成濕疹咁仲有出水現象。覆診時醫生話唔係濕疹係玫瑰痤瘡（誤診！！😡），開咗幾日四環素等一堆藥，食完好左少少但係仍然紅＋痕。

基於嗰位醫生曾經誤診，所以我去睇另一位醫生。另一位醫生話係丘疹膿皰型玫瑰痤瘡😭，比較嚴重一定要食藥。當時我成頭黑人問號，why me⁉️最慘玫瑰痤瘡冇得斷尾！其實早在大爆發前一年左右已經有初期病癥，例如面紅發熱，生啲類似粉刺又痕的粒粒，但無諗過會係玫瑰痤瘡。

呢位醫生唔拖診處方一星期口服藥，食咗一日已經開始退紅皮疹都開始消退。一星期後覆診，醫生話唔洗覆診，食多一星期藥就ok，仲忠告要戒口＆注意生活習慣，要學識同玫瑰痤瘡「共生」！自此以後，我唔可再同陽光玩遊戲，長期帶住把芭蕉扇做人。😂
玫瑰痤瘡無得斷尾不過可以控制，我只係最大爆發時期食過三星期藥💊，日常護膚都係花水＋植物油。每晚都用花水敷面，我會用天竺葵、絲柏、薄荷、德甘、菩提、永久花，用邊隻視乎天氣同面部情況，濕敷對退紅降溫方面幾有效（泛紅血管型嘅朋友話德國洋甘菊退紅特別有效）。大爆發後幾個月，面紅同微絲血管明顯有改善，爛過面亦無疤痕留低。雖然會間中發作但塊面睇上去幾正常 ，如非發炎好勁都唔會搽藥膏。

（我無爛面時嘅相，當時鏡都唔想照更遑論影相，不過如果係2015年5－6月有去過葵芳舊鋪嘅客人應該見過我當時爛面）

玫瑰痤瘡 Do & Don't :
(👇🏻以下純綷個人經驗分享，歡迎各位病友歡迎多多share）

Do:
- 搽防曬，晴天陰天雨天都要搽防曬，最好用純物理性防曬產品
- 戴帽🎩，陽光遮到幾多得幾多，仲有藉口可以買多幾頂靚帽襯衫，唔怕麻煩可以開遮⛱。
- 隨身帶備廢青必備芭蕉扇，feel 到熱熱地就吹下面，我成日吹到自己個頭打風咁款😂
- 皮膚感覺發熱可以用花水或礦泉水噴下幫助降溫
- 勤敷花水
- 夏天衣著盡量通爽👗（就算而家我個人肥到最瘦係手指甲都會照著裙同off shoulder，寧願見脂肪都唔要爛面）
- 避免劇烈及水上活動🏄🏻‍♀️
- relax，唔好俾太大壓力自己，hea 是必要的�- 早啲瞓，充足睡眠😴 (香港人奢侈品......)
- 注意保濕，皮膚太乾都有機會發作
- 盡量用成份簡單刺激性低嘅護膚 &化妝品
- 食熱嘢唔好滾熱辣時放入口🍲
- 多飲水
- 少食感光食物， 「感光食物」確實可能會增加皮膚對紫外線的敏感性，一般正常人正常咁食其實幾乎唔會有問題，不過玫瑰痤瘡患者就要注意吓。
感光食物例如：
檸檬🍋、蕃茄🍅、紅蘿蔔🥕、木瓜、芹菜、萵苣、薯仔、芫茜、莧菜、橙、紫菜、田螺、菠菜、無花果、九層塔、韭菜、紅豆、紅薯、波菜、韭菜、芹菜、白蘿蔔、豆類等...... 其他可自行google ~係咪覺得乜都唔洗食？其實上面堆食物我試過夜晚食少少冇咩事，最緊要日頭做好防曬當正自己係美白戰隊。

Don't✋🏻～
- 唔好浸溫泉、焗拿桑， 係好舒服不過會令面部發滾😱
- 勿做RF treatment，RF係用熱能刺激皮膚生長骨膠原，玫瑰痤瘡患者做RF 死梗
- 醫生話唔好打邊爐...... (我照打但會用風扇吹同避開蒸氣位）
- 醫生話唔好食辣嘢🌶 ......(成日破戒，不過冇以前食到咁辣。any肥，要食辣自己承擔後果）
- 醫生話好唔好飲酒
- 幾凍都勿用熱/暖水洗面，唔用凍水都要用感覺係涼嘅水
- 洗頭時唔好兜頭淋🛀🏻，切勿俾熱/暖水淋到面部
- 唔好過度按摩面部，個人認為facial 對玫瑰痤瘡冇幫助可以慳番
- 盡量唔好情緒激動
- 切記！！勿亂搽類固醇，玫瑰痤瘡患者搽過類固醇停藥後會爆得更嚴重，某啲類固醇藥膏更會令皮膚充血加劇病情（本人為受害者）
- 無病唔好戴口罩😷，焗住塊面係玫瑰痤瘡大忌

雖然玫瑰痤瘡影響外觀又磨人身心，英國更有女患者因玫瑰痤瘡影響儀容抑鬱下跳橋自殺身亡。不過你可以控制佢，而且今日除咗用藥物控制，仲有針對面部血管增生嘅彩光／激光療程，不妨問下醫生意見。我由爛面個幾月到而家睇上去正常都應該幾勵志，所以病友們唔好放棄，生命滿希望😊，唔好死，爛面都可以重生，最重要唔好俾自已太壓力。

我打算做激光打爆啲增生血管，如果有朋友做過請多多分享～！🙏🏻
＃玫瑰痤瘡 ＃florihana ＃花水 ＃純露 ＃生命滿希望 ＃唔好死